Í tíð Lamba hafa NC, án undantekninga, bitið í skjaldarrenndur eftir slöku leikina og frammistaðan verið mun betri í næsta leik. Ég er ekki endilega að tala um tapleiki eingöngu, heldur þessa leiki þar sem liðið hefur bara hreint ekki verið að spila vel hver svo sem úrslitin hafa orðið. Seinasti leikur var slakur. Það mátti sjá hrópað á spjallborðum að þarna hefðu NC átt sinn lélegasta leik á tímabilinu. Ég reyndar algjörlega ósammála því og gæti í snarheitum talið upp 4 leiki þar sem and- og getuleysi var meira en í þessum leik.

Hvað sem því líður þá er nýtt verkefni á næsta leyti og það er heimaleikur gegn Bolton. Ef farið er yfir tímabilið hjá Bolton hingað til þá er ljóst að þetta er ekki besti tíminn til að mæta þeim, alla vega ef tekið er tillit til úrslita undan farið. 1 tap í seinustu 8 leikjum (deild og bikar) og mjög svo frambærileg frammistaða gegn sterkum andstæðingum, og þar skemmst að minnast öruggs sigurs á Púlurum fyrir tæpum 2 vikum.  

NC hafa ekki náð sigri í 3 seinustu heimaleikjum en ég trúi því að mínir menn haldi sínu striki, breyti ekki útaf venjunni eftir slakan leik, og komi ákveðnir til leiks og skili 3 stigum í hús. Ég hef meira að segja trú á að þetta geti orðið þægilegur 2-3ja marka sigur. Ég set á þetta 3-1 en áskil mér rétt til að endurskoða málið ef mér sýnist svo, er nær dregur leik.

Þetta er helgi „stórra leikja“. Ég skora á menn í mini-tippmót! Endilega sendið hér inn ykkar spá fyrir þessa 4 leiki, með markatölu. Verðlaun í boði! 

Chelsea – Man.Utd

Liverpool – Tottenham  

Man.City – Fulham

Norwich – Bolton

Stuttlega að síðumálum. Það hafa orðið nokkur tíðindi frá því seinast og það sem leit út fyrir að geta orðið einfaldur flutningur yfir á Vísisbloggið er að öllum líkindum úr sögunni. Annar möguleiki er í skoðun og hvað sem líður vandræðaganginum þá hef ég enga trú á öðru en að þetta hafist fyrir rest.  

Að lokum langar mig til að láta hér fylgja með liðsskipan úrvalsdeildarfélaganna eins og hún lítur út eftir lokun gluggans og að teknu tilliti til þeir reglna sem nú eru í gildi og útskýrðar eru í upphafi greinarinnar.
Smellið hér!

Þó svo að NC hafi einungis eitt tap í seinustu 10 leikjum og séu taplausir á árinu þá er ég hræddur um að komið sé að tapleik. Sunderland hafa verið á mikill siglingu eftir að lærifaðir Lamba tók þar við og einungis Man.Utd hafa unnið sér inn fleiri stig á þeim tíma en Sunderland. Það er sem sagt mikil uppsveifla í gangi og ég á ekki von á öðru en að enn séu þeir Sunderland-menn að fleyta sér á þeim öldutoppi sem skapaðist við komu O´Neill til félagsins. 

Vonir mínar eru því hógværar fyrir kvöldið. Ég ætla bara að vona að mínir menn láti finna fyrir sér og geri andstæðingunum þetta eins erfitt og frekast er kostur. Sigurinn dettur Sunderland megin, 3-1.

Ekkert er samt útilokað eins og maður er nú farinn að átta sig á. Ef ég hefði val þá flaggaði ég öllum merkjum þó svo að þetta sé í mínum huga svona, 60-30-10 leikur.

Rétt örstutt að kaupum gærdagsins. Eins og áður sagði, dæmigerð kaup fyrir Lamba. Ryan Bennett, tæplega 22 ára varnarmaður. Mikið efni þarna á ferðinni ef marka má umsögn Lamba um leikmanninn og hefur nú Lambi oftar en ekki hitt naglann á höfuðið í þessum efnum.. Hefur spilað fyrir u-21landslið Englands og hefur þrátt fyrir ungan aldur tæpa 200 leiki á bakinu.

NC fær þó ekki að njóta krafta hans fyrr en að mánuði liðnum því samkomulag var um að Peterbro hefði hann út mánuðinn meðan Ferguson leitar að manni í staðinn.

Kaupverð er sagt vera u.þ.b. 3 millj. GBP og það var ekki leiðinlegt að sjá hvernig þetta atvikaðist og NC skyldi ná að hrifsa hann undan nefinu á þeim Swansea-mönnum en hann var á leiðinn þangað þegar hann fær spurnir af tilboði NC og snýr við.

OTBC!

Lokadagur gluggans runninn upp. Í gær voru innan við 30 millj. GBP búnar að skipta um hendur sem er alveg sáralítið miðað við að í fyrra voru það 225 millj. sem rúlluðu milli félaga í heildina. Það var met og þó svo að menn hafi kannski reiknað með að viðskipti yrðu með rólegra móti í þetta skiptið, þá sýnist mér á umræðunni að fæstir hafi reiknað með að sólarhring fyrir lokun væri horft á einungis tæpan 8. hluta summunnar í fyrra.

Það er fjarri lagi að ég ætli að fara að taka undir allt það sem segir hér í þessari annars ágætu grein. En eflaust hafa tilraunir UEFA til að dempa eyðslubrjálaðið og setja hömlur gegn taprekstri sem síðan er þurrkaður upp af megamilljónerum að byrja að skila sér. Annars sýnist mér að þetta sé sambland af fleiri þáttum og ekki síst sú staðreynd að heilt yfir eru fjármálumhverfi álfunnar í kröggum og það sýnir sig í boltanum rétt eins og annars staðar. 

En, glugginn er ennþá opinn. Og ég hef trú á því að áður en dagur er að kveldi kominn eigi talan eftir að rísa all verulega. Hér höfum við boltspjellingar vettvang til að velta okkur upp úr tíðindum dagsins. Væri gaman að heyra menn bregðast við þeim tíðindum sem óhjákvæmilega eiga eftir að birtast okkur í dag. 

Lambi sagði á blaðamannafundi að hann ætti óklárað verkefni í dag. Það hefði komið upp sú staða að skoða þyrfti 1-2 atriði. Hann tók þó fram að hann hefði enga hugmynd um það enn hvort eitthvað yrði úr hlutunum en þetta yrði skoðað. Hann ítrekaði svo að hann upplifði sig í þægilegri stöðu og væri sáttur við sinn hóp að svo komnu máli. Hann gaf ekkert upp um hvort um væri að ræða einstefnu inn, eða út, eða maður / menn í manns stað. Ég ætla því að vona að þetta „eitthvað“ sem er í gangi hafi ekkert með að gera að migið sé utan í okkar bestu menn nema þá að Lambi sé því viðbúinn og klár með að fylla skarðið hið snarasta.  

Þá er runninn upp bikarhelgi og mínir halda gallvaskir í annað sinn á 2 vikum til Black Country og mæta WBA. 2-1 sigur, sællar minningar, um daginn og til að hafa um það sem fæst orð, þá tel ég ekkert því til fyrirstöðu að vinna þarna aftur. Stjórar beggja liða segjast líklegir til að gíra sig með öðrum hætti en venjulega, í það minnsta í mannavali, og gæti það því farið allnokkuð eftir hvernig hraðsoðin blanda dagsins er að reynast á ögurstundu. Eða, auðvitað að Lambi og jafnvel Hodgson líka séu í yfirlýsingum sínum að reyna að afvegaleiða hvor annan en Lambi kom mönnum í opna skjöldu í seinustu umferð með því að tala hlutina niður en stilla síðan upp, því sem næst sterkasta liði. 

Ég er satt best að segja kominn í svolítinn bikarfíling og farinn að binda vonir við að NC verði í hattinum fyrir 5. umferðina. Það er hreinlega ár og öld síðan að maður hefur hugsað; Já, bikarrönn gæti nú bara verið kærkomin reynsla en hvernig er annað hægt en að smitast af mögnuðum stjóranum. En best að missa sig ekkert yfir þessu. Spáin er, 0-2 og við sem sagt höldum hreinu aftur!
Þá er það glugginn. Lambi var hógvær fyrir opnun gluggans en var með 4 aðila sem hann óskaði eftir að stjórnin spyrðist fyrir um. Hann sagðist ekki vilja borga „silly money“ fyrir einn eða neinn og klárlega yrði ekki farið að brjóta upp launastrúktúrinn á þessum tímapunkti fyrir nokkurn mann.

Nú þegar glugginn er að loka lítur einna helst út að uppskeran sé 1 maður inn og 2 (3) út auk 3ja út á lánssamninga.

Inn kemur Johnny Howson fyrir einhverja upphæð nálægt 2 millj. GBP  

Út fara Oli Johnson og Stephen Hughes á „free transfer“. Nú, svo er vert að nefna að þriðji maður út telst vera De Laet en hann var lánsmaður frá Man.Utd.

Lambi segir mest um vert að halda í sína bestu menn og segist hann sáttur, enda með góðan hóp. Hér má sjá stutta grein þar sem hann rennir yfir stöðuna . 

Eins og boltspjellingar hafa eflaust veitt athygli hefur könnun verið í gangi hér vinstra megin. Eins og stundum áður hefur þetta sýnt sig vera tilgangslaust, alla vega til að fá einhverja raunhæfa niðurstöðu, því ekkert virðist því til fyrirstöðu að menn salli inn atkvæðum frá sömu ip-tölunni ef menn hafa einbeittan „brotavilja“ . Ég hef það samkvæmt áreiðanlegum heimildum að þannig sé það í þetta skiptið. Eitt er þó augljóst og það er að einhverjir 2 aðilar en þó að mestu einn, hafa verið manna duglegastir við að smella á efsta valkost. Ég held að ekki þurfi að velkjast í vafa um að þarna eru á ferðinni aðili /aðilar sem hlítur að sárna að sjá NC í góðri stöðu og vona að Lambi hverfi á braut sem fyrst. Þó svo ég agnúist út í það að menn vísvitandi geri könnunina marklausa þá vil ég að það komi hér fram að ég er alls ekki að segja að þetta sé útilokað og einhver sú staða komi upp að allt í einu sé Lambi á leiðinni út. Money talks! 
Sjálfur er ég að reyna að forðast það að hafa of miklar væntingar til þess hversu lengi við njótum krafta hans og smellti því við 1-2 tímabil í viðbót, einu sinni. Könnunin kemur til með að standa hér út mánuðin svo enn geta boltspjellingar bætt við atkvæðum. 

Ágætu boltspjellingar. Hér kemur kærkominn pistill í boði Aðalsteins J. Halldórssonar. Njótið vel!  Vefstjóri

--

Ég vil byrja á ef til vill nokkuð óvæntum stað. Derby og stjórinn þeirra Klöff! Eins og hefur komið allnokkuð oft fram hér á síðunni þá hef ég vægast sagt verulega efasemdir um að Klöff sé rétti maðurinn í starfið hjá Hrútunum. Hann er náttúrulega sonur föðurs síns og fékk starfið þess vegna. Þeir eru þó líklega voðalega ólíkir stjórar ef marka má árangur þess yngri hingað til. Það breytir þó ekki þeirri staðreynd að eitthvað hefur verið að gerast undanfarið hjá þeim hvítklæddu. 16 stig af síðustu 21 mögulegu bendir til þess að allt önnur holling sé á liðinu (þar af sigur gegn Big Sam og West Ham). Auk þess vannst sigur á Örnunum í bikarnum mitt á milli þessara sigra. Vitaskuld hefur liðið rokið upp töfluna um leið og þetta hefur gerst og playoff ekki langt undan núna - allt getur gerst. Hvað veldur þessari umbreytingu? Ég hef grunsemdir um að það sé ákveðið gult spjald sem sýnt var Klöff fyrir leikinn gegn Bristol City þann 10. desember síðastliðinn. En hvað veit maður?

Enn heldur Öskubuskuævintýrið á Carrow Road áfram. Það getur enginn orðið neitað því að árangur Norwich undanfarið 4-5 misseri er kraftaverki líkastur. Eins og staðan er í dag þá er jafnvel hægt að gæla við Textavarpskeppnissæti næsta tímabil þó svo ég eigi nú síður von á því að það gerist. En Norwich falla ekki úr þessu, nei, það er ljóst að hér er á ferðinni eitt sterkasta liðið sem hefur komið upp í Premíuna í langan tíma. Ég tel að leikmennirnir séu minni þáttur í þessum árangri. Þeir eru margir ágætir en ég held að stjórinn sé potturinn og pannan í þessum stórfenglega árangri. Vonandi nær klúbburinn að halda honum nógu lengi til þess að hanga upp í efstu deild í einhvern tíma. Þá verður auðveldara að fá góðan arftaka og góða leikmenn. Ég læt ekki hér við sitja. Ég lýsi því yfir hér með að efstur á óskalista mínum yfir arftaka Sir Alex Ferguson er enginn annar en Paul Lambert. Framúrskarandi árangur með Norwich og sú staðreynd að hann er ekki "mengaður" af öðrum "toppklúbbum" (hefur t.d. aldrei stýrt Chelsea) færir honum fyrsta sætið eins og staðan er núna.

En talandi um mína menn. Sjálfsagt verður verðlaunaskápurinn lítið þyngri í vor en áður. Vissulega er fínn möguleiki í þremur keppnum sem eftir eru en ég á síður von á því að þeir klári mikið af þessu. Kannski Textavarpskeppnina eða FA bikarinn en líklega verður það hommablái helmingur Manchester sem hreppir bikarinn sem öllu máli skiptir í vor. Staðan er einfaldlega sú að liðið er ekki nægilega strekt til að takast á við öll þau meiðsli sem hafa dunið á félaginu í vetur. Þó svo að við hefðum orðið heppnari með meiðsli efast ég um að það hefði dugað til. Það vantar einhvern neista í liðið til þess að gera það frábært. Sá neisti verður að vera aðkeyptur. Auk þess er Fletcher nánast hættur! En ég missi nú ekki svefn yfir þessu. Við sigrum þá bara á næsta ári.

Hvað segja menn um Demba Ba? Er þetta "sæn" 21. aldarinnar hingað til? Verður Arsenal á eftir honum í sumar? Eða jafnvel LIverpool (geta boðið taglið og 20 millur)? Ef ekki væri fyrir þessa Afríkukeppni hefði hann líklega orðið markahæstur með sama áframhaldi. Það með skítaliði Newcastle. En svo veit maður ekki. Ég man eftir framherja hjá Newcastle sem var búinn að skora helling fyrir liðið á þessum tíma í fyrra en er núna á eftir Dirk Kát í goggunarröðinni hjá sínu félagsliði um stöðu í framlínunni.

Liverpool er í undarlegri stöðu núna. Aðdáendur liðsins hafa ekki verið ánægðri í 20 ár. Samt er liðið að skila álíka slöppum árangri og þótti gjörsamlega óviðunandi undir stjórn Benna, Roy og Meistara Houllier. Afar furðulegt. En slöpp úrslit eru víst í góðu lagi núna vegna þess að King Kenny er við stjórnvölin. Auk þess skýtur liðið mjög oft í stöng sem bætir upp fyrir árangsleysið heyrist mér. Auk þess er þetta ekkert sem liðið er að fá á sig af mörkum þannig að staðan er í raun ljómandi góð!

Ég ætla að enda á boltaspjallinu sjálfu. Það er með sorg í hjarta sem ég ræði hér með endalok boltaspjallsins í þessari mynd sem við þekkjum. Ljóst er að við boltaspekingar hefðum helst kosið að halda í þessa síðu í óbreyttri mynd. Hvernig má annað vera? Þessi síða hefur verið sú besta á internetinu, með hléum þó, alveg frá stofnun. Þær ánægjustundir sem við höfum upplifað með síðunni eru óteljandi. En lífið heldur áfram bíst ég við. Mín tillaga í málinu er sú að hafa þetta sem minnst rask. Mér skilst að með lágmarksfyrirhöfn sé hægt að flytja síðuna yfir á blogg Vísis og tel ég að það sé framtíðarfarvegur spjallsins. Sérstaklega ef það er staðreynd að gömlu pistlarnir og athugasemdirnar muni fylgja með í "kaupunum". Þeir eru náttúrulega ómetanleg heimild.

Með kveðju,

ajh

Það er stundum eins og maður þurfi að klípa sig þegar skautað er um boltheima og maður minnist þess að á sama tíma fyrir 2 árum voru það Brentford og Walsall sem voru á radarnum. Umbyltingin getur vart hafa átt sér stað á skemmri tíma. Þetta er búin að vera löng og mikil veisla, sannkölluð sigurganga og maður yfirfer til öryggis í þrígang tölfræðina áður en maður hendir henni hér inn; 3 sigrar í röð, 1 tap í seinustu 8! 

Magnaður stjóri og ótrúlegir leikmenn. Ég segi ótrúlegir en er þá ekki endilega að meina ótrúlega góðir heldur ótrúlegir sumir hverjir fyrir það að vera afskrifaðir trekk í trekk sem úrvalsdeildarleikmenn. En Lambi hefur, staðfastur í sannfæringu sinni, einfaldlega sagt „upgrade“ og eins og hugbúnaður tölvunnar fáum við Grant Holt version 3,03, sem mætir öllum nýjustu kröfum og skilar sínu í sterkustu deild heims. Og ef farið er yfir feril leikmannsins þá má segja að þarna sé kominn amatör útgáfa af annars fokdýrum hugbúnaði, sem farið er að bera saman við það dýrasta sem finna má á markaðnum og er jafnvel að virka miklu betur. Hér má t.d. sjá skemmtilega umfjöllun frá The Independent í tilefni leiks dagsins gegn Chelsea. 

Þess má geta að Glasgow Rangers eru nýjustu aðilarnir sem hafa verið að gera hosur sínar grænar fyrir Hestinum en McNally hefur sagt þeim að hann sé ekki til sölu.

Allt getur gerst í dag að mínum dómi. Enn er tölfræðin NC megin ef skoðaðar eru innbyrði sviðureignir þessara liða í deildinni í gegnum árin. Chelsea hafa saxað á þetta og einn vinning eiga NC í forskot. En auðvitað vinnst enginn leikur á gamalli tölfræði. 

Lýkurnar eru vissulega Chelsea megin en á góðum degi er sigur alls ekki óraunhæf niðurstaða. Þetta er svona 20-20-40 eða 1x2 staða og ég er svolítið í sama gírnum og fyrir seinasta leik að ég verð bjartari og bjartari því nær sem dregur leiknum. Tap í gær en hallast helst á að niðurstaðan verði 2-2 jafntefli.

-- 

Mig langar til að deila með ykkur örfáum atriðum sem ég hef hrasað um að undanförnu og langar að fleygja fram hér spurningu sem gæti sómað sér vel í hvaða barsvari sem er.

Hvaða lið hefur fengið á sig flest mörk í úrvalsdeildinni frá upphafi hennar? 

Ég fleygði þessu fram í góðra vinahópi um daginn og það var ekki fyrr en ég endurorðaði spurninguna; „Hverjir eru lélegasta „ever present“ liðið í deildinni?“, að svarið kom.

Þau félög sem hafa setið í úrvalsdeild frá stofnun hennar eru sjö talsins, ásamt mörkum sem þau hafa fengið á sig þá er þetta svona:

Tottenham (1000) 

Everton (963)
Aston Villa (897)
Liverpool (731)
Chelsea (720)
Arsenal (699)
Man Utd (647)
Það vekur athygli að ekki einu sinni þarna eru Tottenham topp 6 klúbbur nema auðvitað að öfugum forsendum.

Örstutt að NC, Lamba og „glugganum“. 

Enn sem komið er hefur ekkert það gerst sem gerir mann órólegan eða gefur tilefni til að halda að einhver skörð verði höggvin í raðir minna manna í þessum janúarglugga. Lambi er samur við sig og öll hans umfjöllun er þess eðlis, eins og venjulega, að halda mönnum í algjörri óvissu um hvað er í gangi og helst ekkert að gefa upp um á hvaða miðum hann rær. Eitt „sæn“ er í pípunum, Howson frá Leeds, og eins og ég hef áður sagt þá er ég sáttur við það. Það er hins vegar súrt að hann skuli vera meiddur og þar sem þetta hefur verið í pípunum í nokkra daga án þess að yfirlýsing um undirritun hafi verið formlega tilkynnt þá óneitanlega hefur maður áhyggjur af að ekki sé allt sem skyldi. Eru hnémeiðsli hans verri en menn ætluðu? Eða eru aðrir aðilar komnir að borðinu?

Hef ég einhverjar væntingar til gluggans? Ég er salla rólegur yfir stöðunni og á mér einungis eina von; að við höldum okkar bestu mönnum. Treysti stjóranum fullkomlega til að vega það og meta hvar skóinn kreppir og hversu mikið ef eitthvað má leggja út af fjármunum til að mæta því. Get þó ekki forðast þá hugsun að öflugur reynslumikill varnarmaður væri vel þeginn til að styrkja hópinn.

Kæru boltspjellingar.

Eftirfarandi blasti við mér þegar ég ætlaði að henda inn pistli dagsins:

"BlogCentral.is lokar

Nú þegar flestir nota miðla eins og Facebook.com, Twitter.com og Tumblr.com til þess að eiga samskipti við sína nánustu, þá hefur notkun á BlogCentral minnkað mikið síðustu mánuði. Því hefur verið ákveðið að taka ekki við fleiri nýskráningum og loka vefnum á næstu vikum.

Núverandi notendur munu þó fá ráðarúm til þess að koma sér upp bloggi á blogg.Visir.is og geta óskað eftir aðstoð við að ná texta og myndum út úr BlogCentral til þess að flytja með sér.

Virðingarfyllst,

 Vefstjóri BlogCentral"

Ég óska þess, félagar góðir, að heyra frá ykkur með framhaldið. Hvað skal gera, hvert skal ég halda? Eitt er alla vega klárt að ekki er ég tilbúinn til að leggja upp laupana á þessum tímapunkti. Verst þykir mér að hafa ekki í framtíðinni aðgang að því sem hér hefur verið ritað. 

Enn einn boltadagurinn runninn upp og þrátt fyrir annir ætla ég að reyna að skapa mér þær aðstæður að geta, í það minnsta, horft á mína menn í dag.

1 tap í seinustu 7 leikjum (deild og bikar) og heilt yfir ekki hægt að kvarta yfir nokkrum hlut. Mótherjar dagsins eru WBA og er ég bjartsýnn á að ófaranna frá fyrr leik félaganna verði hefnt. Þá fóru Hodgson og co. með sigur 1-0 en óhætt að segja að lánið hafi verið allmikið þeirra megin þann daginn. 

Það er athyglisvert að skoða nokkur atriði út tölfræðinni fyrir þennan leik.

Norwich hafa skorað flest skallamörk allra liða í deildinni eða 12. WBA hafa hins vegar fengið á sig lægsta hlutfall skallamarka eða 11%. 

Ekkert lið hefur hærra hlutfall marka sinna skoruð í fyrri hálfleik en WBA eða 63% og í 2 síðustu viðureignum liðanna hafa þeir skorað á fyrstu 3 mín. gegn NC. 

Ef við gefum okkur að það endurtaki sig að WBA taki forystuna snemma þá er ekki öll nótt úti því 3 hafa þeir tapað leikjum sem þeir hafa haft forystuna í en það er oftar en nokkuð annað úrvalsdeildarlið, jafnvel þó það sé ekki oft.

WBA hafa einungis skorað 19 mörk sem er næst minnst á eftir Wigan, 18. WBA hafa ekki skorað í seinust 3 deildarleikjum. NC hafa skorað 30 sem er hæst utan top 5 en þeir hafa ekki haldið hreinu enn sem komið er í vetur. 

NC hafa ekki tapað í 3 seinustu útileikjum. En þeir hafa einugis 1 sigur í seinustu 5 heimsóknum á The Hawthorns.

Spá mín er í dag bjartsýnisspá. Í gær sagði ég jafntefli en í dag ætla ég að hafa þetta sigur 1-2 og gott að ekki er lengra komið fram á daginn því þá væri ég kominn út úr kortinu. 

Að lokum læt ég fylgja hér tvær krækjur á 2 góðar greinar sem ég hrasaði um í morgun. Önnur er um hinn óviðjafnanlega Grant Holt og gefur innsýn í skemmtilega sögu hans og bakgrunn. Hin greinin er um stöðu Everton og er lýsandi fyrir það rekstrarumhverfi sem skapast hefur í deildinni á undan förnum árum.

The Incredible Holt  og hér má svo sjá góða markasyrpu

Everton - Where The Money Goes

Ég tek mér það ritstjórnarleyfi að setja hér langt innlegg ÆÞÆ frá í morgun, sem formlegan pistil. 

Njótið vel.

Vefstjóri

Ég þakka kærlega fyrir frábæra kosningu og við atkvæðagreiðslu Guðmundar skelli ég 1 atkv á sjálfan mig ef það má. Ég hef þó komið hérna inn undanfarið, en þó ekki eins oft og áður og m.v. "nýjasta" útspil vefstjóra má skilja hvers vegna.

En við skulum byrja á byrjuninni, vefstjóri minnir menn á að gestapistlar eru velkomnir og sýnist mér það vera frábær leið til að brydda upp á einhverjum nýjungum. Sama gamla sagan um gildi og ekki gildi FA-cup og má segja að algert metnaðarleysi ríki hjá vefstjóra, því það er í lagi að minna hann á það, að þrátt fyrir að hafa farið alla leið inn í djúpan dal með liðinu sínu, alveg niður í gömlu 3.deildina að þá er liðið í dag premiu-klúbbur og það meira að segja í 9.sæti svo allt tal um "mér er alveg sama" um árangur í þessari bikarkeppni af hálfu vefstjóra er auðvitað ekkert annað en varnarbarátta sem lítur kjánalega út svo ekki sé dýpra í árina tekið.

Svo byrjar hann að ræða Liverpool, á þeim nótum sem flestir þekkja, og er nú farinn að leiðbeina King Kenny, Kenny Dalglish um það hvernig hann skuli vinna vinnuna sína sem knattspyrnustjóri liðsins. Ég hugsa nú að Kenny Dalglish hafi aðeins betri tilfinningu fyrir því hvernig sé best að hátta málum á Anfield heldur en vefstjóri. Vefstjóri er búinn að vera mjög upptekinn af Luis Suarez "El Pistolero" frá því að sá frábæri knattspyrnumaður gekk til liðs við Liverpool, og er nú svo komið að í umræðum, hvort sem þær tengjast knattspyrnulegri getu Suarez eða Suarez vs evra að vefstjóri er marklaus, búinn að mála sig út í horn. Erfitt að taka mark á hans "vangaveltum" um þennan besta leikmann Copa America s.l. sumar.

Hann hefur verið gjarn á að tala um dýfu hitt og dýfu þetta en m.v. leikina undanfarið að þá ætti vefstjóri að taka til í sínum eigin garði áður en hann fer að slá aðra, því bradley johnson svindlaði leikmann Q.P.R. útaf nú ekki fyrir löngu síðan þegar leikmaður Q.P.R. átti að hafa skallað johnson og því miður gekk dómarinn í ljóta gildru johnson.

En að efnislegri umræðu um mál málanna (ef það er hægt), kynþáttafordómar hjá leikmönnum og stuðningsmönnum Liverpool. Eru þeir til staðar, erfitt að svara því en varðandi leikmenn myndi ég klárlega segja að enginn leikmaður Liverpool væri kynþáttahatari og tek ég því undir varnir klúbbsins þegar hann hefur varið "El Pistolero". Það hlýtur að mega gagnrýna FA, eða hvað. Í máli "El Pistolero" vs evra tók sambandið málið í sínar hendur og yfirheyrði báða leikmennina, að vísu fékk evra 3 svona aukafundi með sambandinu í aðdraganda yfirheyrslnanna. Orðið sem um er rætt er Negro. Nú liggur það fyrir orðið Negro er mjög oft notað í S-Ameríku, þaðan sem Suarez kemur en það breytir því ekki að orðið er greinilega bannað á englandi og FA gat því hnykklað vöðvana í sinni keppni út á við og sýnt umheiminum það að þeir séu ekkert lamb að leika sér við. Þetta gæti þýtt að þeir fái einhverntíman að halda stórmót á næstu 10-20 árum. Semsagt, FA ákvað að rannsaka málið. FA ákvað að ákæra "El Pistolero". FA ákvað svo hverjir skyldu dæma í málinu. Allt saman mjög eðlilegt. Að tala svo um að menn megi ekki verja sig er auðvitað bara hlægilegt. Liverpool klúbburinn og allir þeir sem þar eru, ásamt reyndar fullt af fólki, m.a. Martin Jol sem þjálfaði Luis Suarez hjá Ajax telja að Suarez sé eins langt frá því að vera kynþáttahatari eins og hugsast getur. Suarez var gerður að fyrirliða hjá Ajax, m.a. vegna þess einmitt að hann átti auðvelt með sameina fólk, af mismundandi þjóðernum og litarhafti. Ég vildi óska þess að einn daginn yrði Luis Suarez gerður að fyrirliða á Anfield og myndi ég með geysilegu stolti fylgjast með honum ganga út á völl með Liverpool liðið sitt.

Það er a.m.k. ljóst að gaman verður fyrir þá sem kusu Luis "El Pistolero" Suarez sem besta leikmann árið 2011 í þættinum "Goals on Sunday" á Sky Sports að sjá Suarez aftur á vellinum, gerandi það sem hann gerir best, að klobba varnarmenn og leika aðrar listir inn á vellinum. En í kosningunni varð nani í 2.sæti.

http://www.skysports.com/tv_show/story/0,20144,12384_7393506_12384,00.html

En er varðar kynþáttaníð á Anfield Road. Leikmaður Oldham varð fyrir þeirri ömurlegu upplifun að 8-10 manns gerðu grín af litarhafti leikmannsins í leik liðanna nú fyrir skömmu. Liverpool F.C. brást snöggt við og kom yfirlýsing fljótlega sem innihélt afsökunarbeiðni til leikmannsins. Einnig fá þeir aðilar sem hvað lengst gengu vonandi lífstíðarbann frá Anfield. En á Anfield koma saman 45.000 manns og erfitt er að hafa stjórn á því hvernig þetta fólk hagar sér á vellinum, það hljóta allir að skilja.

Um það að ferguson og Dalglish ætli sér að "semja frið" f.h. klúbbanna að þá er það rétt, þrátt fyrir 3ja daga gamla frétt frá Andra um hið gagnstæða og er það ekki í fyrsta skiptið og reyndar vonandi ekki það síðasta sem Andri er á flandri með sinn málatilbúnað.

Skilaboðin sem koma svo hingað frá múrbúðinni eiga ættir sínar að rekja til flatey á skjálfanda svo lítið er við því að gera eða segja. Stjórnarformaður víkurrafs er svo mættur hingað inn með sín mánaðarlegu skrif um auðvitað ekki neitt nema dylgjur og öðru því tengdu. Það greinilega skiptir ekki máli hvort stjórnarformaðurinn ræði fótbolta eða pólitík, sem reyndar einfaldar hlutina fyrir manni.

En að boltanum svona almennt undanfarið.

Við lágum illa fyrir Manchester City úti nú um daginn, en ef það er einhver leikur sem ég sætti mig við að tapa að þá er það þessi leikur. Mættum einfaldlega langsterkasta liði englands. Áttum aldrei sjens. Svo tókum við Oldham í bikarnum heima 5-1. Það sem hefur hinsvegar glatt augað er frábært deildar-rönn á júnæded. Tapa heima fyrir Blackburn og svo steinliggja þeir fyrir Newcastle úti, þar sem phil jones (næsti steve bruce) átti stórbrotin leik og gladdi augað (a.m.k. mitt auga) eiginlega allan leikinn en menn voru að grínast með það eftir leik að hann hefði unnið einn skallabolta í öllum leiknum og var það þegar hann skoraði sjálfsmark. Alltaf gaman af góðum bröndurum. Svo reyndar mætti júnæded á Etihad-völlinn og sá ég leikinn. En það var frábær skemmtun sömuleiðis, og mælist ég til þess að í leikjum milli þeirra liða að þá fái bara júnæded að leika 11 á móti 10 svo til allan leikinn. Það gerir leikinn bara meira spennandi og jafnari á allan hátt, því ekki nenni ég að horfa á 1-6 leik aftur. Það á reyndar ekki að þurfa fyrir litla shrek að biðja um rautt spjald á andstæðing sinn í leik sem þessum, dómarinn á bara að gefa honum rautt strax eftir brot.

Svo undanfarið hafa komið inn í deildina 2 fyrrum leikmenn premier league. Thierry Henry og paul scholes. scholes kom inn og spilaði reitarbolta við félaga sína þegar þeir voru að tefja í leiknum gegn Manchester City og skilaði boltanum oftar en ekki til samherja sinna og fékk lof fyrir. Það var annað upp á teningnum í gærkvöldi þegar Thierry Henry steig upp hjá Arsenal á nýjan leik og skoraði sigurmark þeirra gegn Leeds, hann heldur betur stimplaði sig inn á Arsenal og er ljóst, að hann hefur engu gleymt.

En ætli ég láti þetta ekki bara duga, og minni menn aftur á að grípa gestapistils-gæsina á meðan hún er þarna. En ég auðvitað hef ekki tíma í þetta sem stendur, stendur óvenju illa og alls óvíst hversu miklu lífi ég næ að halda í þessu hér á næstu vikum á mánuðum.

Ágætu boltspjellingar. Það stefnir í verulega annasama tíma framundan hjá mér og það er því alls óvíst hversu miklu lífi ég næ að halda í þessu hér á næstu vikum og mánuðum. Ég hef þó klárlega engan annan þann ásetning en að reyna að klóra í bakkann þó ekki verði mikið í lagt. Ég vil minna menn á að gestapistlar eru velkomnir.

Þá kemur umfjöllunin sem Alli var að bíða eftir. "dettum sennilega út úr FA bikarnum vegna þess að deildin er forgangsatriði" – pistillinn. Þetta er ekkert langt frá lagi og í rauninni væri einfaldast fyrir mig að endurtaka bara það sem ég setti hér hinn fyrir seinasta bikarleik. En þegar ég segi að þetta sé nálægt lagi þá á ég við að seinni hluti tilvitnunarinnar er augljóslega réttur í þessu samhengi og klárt að Lambi ætlar að gefa einhverjum „fastamönnum“ frí. Hann hefur, að mínum dómi, algjörlega réttar áherslur gagnvart bikarnum á þessum tímapunkti og áherslan á það sem mestu skiptir er óhögguð. Það er ekki tímabært leggja mikið í eða undir fyrr en áframhaldandi úrvalsdeildarsæti er tryggt. 

Ég syng því sama sönginn og áður. Bikarinn skiptir mig engu þannig lagað séð. Hins vegar er óásættanlegt að menn „mæti ekki til leiks“ eins og gerðist í seinasta bikarleik. Þar held ég að við Lambi hljótum að vera sammála og ég trúi því að það verði séð til þess í þetta skiptið. Ég vil ekki sjá mína í herðaskitu á heimavelli gegn Burnley og ég spái því að hjá því verði komist og sigur vinnist, 1-0 og þar með verði haldið hreinu svona til tilbreytingar.

Af mörgu er að taka í umræðunni en örstutt að Liverpool og því nýjasta.  

Það er ekki að furða að uppákoman í leik gærdagsins sé sett í eftirfarandi samhengi.

"Liverpool FC officials are desperate to identify the fans who racially abused Tom Adeyemi, so they know which names to print on the t-shirts" – til að sporta í á næsta heimaleik.  

Harmsaga þessa félags á undan förnum vikum er verða sárari en tárum taki. Ég tek undir með þeim pönditum sem lýst hafa áhyggjum sínum af þróun mála og finnst að núverandi stjórn, stjóri og leikmenn félagsins hafi stórlega skaðað ímynd félagsins.
Ég held að það væri félaginu fyrir bestu að reyna í það minnsta, að halda stjóra ónefnunni frá fjölmiðlum eða alla vega að fara fram á það við hann að hann haldi kjafti svo meira bull og kjaftæði flæði ekki út til að gera meiri skaða. M.ö.o. að knattspyrnuheimurinn fái „sérstaka vernd“ fyrir ósómanum, rasismanum, samsæriskenningunum og kröfunum um sérmeðferð sem hann hefur þurft að umbera að undan förnu frá þessari saurfötu sem er Anfield og því félagi sem þar er til húsa. 

.... en fúll verð ég ekki hvernig sem fer. Gott boltaár brátt að baki og ástæða til að horfa björtum augum fram á veginn.

Ég spái því að mínir rífi sig upp eftir slakan heimaleik og Fúlir verði lagðir af velli í dag. Þetta verður sannfærandi og stór sigur og Hilmar Dúi ekki til viðræðu fyrr en í apríl.

Annars tek ég hatt minn ofan fyrir Alla sem setti fram spádóm fyrir ekki margt löngu sem ég gaf langt nef með hæðnislegri athugasemd á öðrum vettvangi en þessum. Blackburn sigraði Man.Utd í dag og það að spádómur um það komi frá Man.Utd-manni gerir þetta enn betra. Alli var með þetta og spáði í kjölfarið uppreisn æru, liðs og stjóra. Þetta er klárlega einn af spádómum ársins.

Að lokum félagar góðir. Óska ykkur gleðilegs nýs árs og

þakka ykkur fyrir allt gamalt og gott.

Enn einu sinni situr maður með kjánahroll eftir lesturinn! Ég vísa þar til innleggs SÆH (kl. 15.48  ) við seinasta pistil. Það er auðvitað að bera í bakkafullan lækinn að setjast yfir að svara þessu innleggi SÆH og í sjálfu sér ætti ég ekki einu sinni að vera að ómaka mig við það því vissulega þekkja allir söguna nema kannski SÆH. Og þó svo að maður sé allur að vilja gerður að virða honum það til vorkunnar að vita ekki betur ætla ég að láta hafa mig út í þá vitleysu að gera hér smá tilraun til að varpa ljósi á söguna.

Byrjum aðeins á samanburðinum og minnumst þess að í gegnum tíðina er ólíku saman að jafna NC og TH. Saga TH er allnokkuð lengri en NC og varla hægt að hugsa sér ólíkari bakgrunn félaga að verða til og eða þróast í. Annar er höfuðborgarklúbbur í milljónaborg, hinn er smábæjarklúbbur út á landi. Munurinn er gígatískur og það er ekkert öðruvísi þarna en alls staðar annars staðar, að stærstu og sterkust félögin verða oftast til þar sem "catchment area" er stór. Því hefur það atvikast þannig að þau félög sem hafa bestan árangur þegar sagan er skoðuð eru oftar en ekki frá stærstu stöðunum. Jafnvel eftir að fjármálaumhverfi íþróttarinnar umturnaðist breyttist það sáralítið því allt ber að sama brunni fyrir rest, fjárfestingakostirnir eru bestir þar sem fjöldinn er líklegastur til að sækja leiki. 

Ekki eru öll félög á Lundúnasvæðinu stór og öflug. En höfum það á hreinu að ALDREI hefur THFC litið á sig sem lítinn klúbb. Í gegnum söguna hafa menn á þeim bænum gefið sig út fyrir að vera stór, öflugur og oftar en ekki topp sex klúbbur. Á þessu hefur verið hamrað án afláts og af þvílíkri hörku að menn trúðu þessu sama hver staðan var og trúa þessu enn. Reyndu menn þá gjarnan að afsaka sig með frasanum „sleeping giant“ eða eitthvað álíka barnalegt.

Staðreynd málsins er svo sú að þessi "hér-um-bil" og "wanna-be" klúbbur hefur frá því að hann vann titil einmitt ekki verið neitt annað. Menn toppuðu fyrir hálfri öld og hafa síðan logið því að sjálfum sér að þeir séu þar enn. 

Skoðum staðreyndirnar í tölum. 

Ef tekinn er árangur félagsins frá því að það vann annan af tveimur (ég endurtek TVEIMUR!) meistartitlum sínum, 1960-61 þá hefur ekkert unnist nema örfáir bikartitlar. Við erum að tala um að á hálfri öld hefur meistaratitill aldrei verið í sjónmáli og 2 sætið náðst í 1 skitið skipti. Þetta er staðreyndin um „topp sex“ klúbbinn. 

Frá þessum blómatíma erum við að tala um 50 tímabil og meðaltalið er 9. sætið ! (ef námundað er frá 8,84 uppí næstu heila tölu). 9. Sætið! M.ö.o topp sex klúbburinn er að ná því að vera um miðja deild, þessi sofandi risi, þessi stóri klúbbur með „sína glæstu sögu“!.... og hverjir þeir eru ekki frasarnir.

Ef einungis er skoðað frá stofnun úrvalsdeildar hefur risinn verið í 9. sæti þannig að meðaltali er framþróunin frá stofnun úrvalsdeildar engin og meðaltalið meira að segja ögn slakara eða 9,2 ! Á þessu tíma, sem eru að verða 20 ár, hefur félagið einungis unnið 2 titla og það var deildarbikarinn.

Þessi stutta samantekt segir og styður það svo ekki er um að villast að "hér-um-bil" og "wanna-be" klúbbur er fullkomlega réttlætanlegur stimpill og verður það svo lengi sem stuðningsmenn hans kjósa að koma ekki niður á jörðina. 

SÆH getur því, ef honum er einhver þægð í því, tekið sitt Tottenham wank-fest og skitið í leiðinni yfir NCFC. En NC hefur aldrei gefið sig út fyrir að vera annað en smábæjarklúbbur. Menn hafa ekkert gengið með einhverjar grillur í hausnum um það að titlarnir séu að fara að hrynja inn. En þarna hafa menn, „í meðalmennskunni og metnaðarleysinu „ byggt upp félag í lítilli borg (sbr. Wiki. Popul. 135.100, urban 259.100, Metro 376.500) með ótrúlega lítið „catchment area“ sem fyllt hefur völlinn tímabil eftir tímabil, undanfarið, hvað sem deildin hefur heitið. Í metnaðarleysinu er verið að leggja drög að því að stækka völlinn því vitað er að hægt væri að fylla mun stærri völl. Í meðalmennskunni og metnaðarleysinu hefur tekist að koma félaginu í tvígang í úrvalsdeild og fyrst á innan við áratug frá því að Delia Smith bjargaði því frá glötun. Þessi Delia Smith hefur sett hærra hlutfall af sínum tiltölulega hóflegu auðæfum í knattspyrnufélagið NCFC en nokkur annar meirihlutaeigandi eigandi úrvalsdeildarfélags hefur gert frá upphafi úrvalsdeildar.

Þetta hljómar kannski lítið afrek í samanburði við alla titlana sem hrannast hafa upp hjá „topp sex“ klúbbnum og í kolli SÆH og annarra Tottarar sem vaða um í sjálfsblekkingarvímunni og draumum um titla. Þetta er hins vegar alveg nóg fyrir mig. Ég geri mér engar grillur en ég á mér hóflegar vonir byggðar á stöðu félagsins í dag, fjölda áhorfenda á leikjum, fjárhagsstöðu félagsins og þeirrar staðreyndar að við duttum í lukkupottinn og höfum góðan stjóra. Þær vonir ganga út á það eitt að tolla uppi þetta tímabilið og ekkert annað. Ef það gengur eftir get ég kannski farið að láta mig dreyma um að á næstu árum gæti félagið staðsett sig sem úrvalsdeildarfélag á reglulegum basis og það er ekkert sem ég gríp úr lausu lofti að gæti verið (ég endurtek, gæti verið) möguleiki. Það er blákalt mat þeirra sem veg og meta stöðu félaganna í því rekstrarumhverfi sem um ræðir. Samkvæmt því er NC gott „bet“ sem topp 20 klúbbur. En það er fjarri lagi að ég ætli þeim þá stöðu sem einhvern sjálfgefin hlut, hvorki í umræðu né í raunveruleikanum. 

Ég kalla því á þá stuðningsmenn "hér-um-bil" og "wanna-be" klúbbsins, THFC að minnast þess hver staðreyndin er um þeirra árangur, hvort sem tölum um hálfa og eða heila öld. Ég vil líka brýna þá til þess að hafa þá sómatilfinningu gagnvart andstæðingum sínum sem jafnvel eru nýjir í þessari deild að skíta ekki yfir þá nema hafa það þá alla vega í huganum í leiðinni að THFC hefur haft 49 tímabil til að aðlagast lífinu í þessari deild, (eftir að þeir náðu titli síðast) og ná því að vinna titil aftur, EN ÁN ÁRANGURS!

Ég átti nú von á fjörlegri umræðu hér og var farinn að bíða eftir einhverjum viðbrögðum svona áður en ég færi að tjá mig eitthvað.

En hvað sem því líður þá er svo sem ekki margt um þennan seinasta leik að segja. Mestu vonbrigði vetrarins og það að mínir menn skyldu þurfa að eiga lélegustu heimavallar frammistöðu tímabilsins gegn Tottenham var erfitt að kyngja. NC verðskulduðu ekkert frá þessum leik og voru yfirspilaðir af sterkara liði.

Alverst og veldur mér áhyggjum eru ákveðnar brotalamir sem hafa verið að láta á sér kræla og ég velti fyrir mér hvort menn séu byrjaðir að flækja hlutina full mikið fyrir sér. Þú þarft að hafa virkilega góða leikmenn í öllum stöðum til að geta verið mikið að hræra í leikskipulaginu frá einum leik til annars. Þetta var traustara framan af þegar leikskipulag var í fastari skorðum og minna um mannabreytingar á milli leikja.

Lambi sagði eftir leik "We gave it a go". Ef það er tilfellið þá var þetta lélegasta "go" sem ég hef séð og það er akkúrat ekkert sem styður það svona þegar tölfræðin er skoðuð. "Team work rate" í þessum leik var ekki á við það sem verið hefur nánast án undantekninga í leikjum tímabilsins.

En kannski er þetta óþarfa áhyggjur og það er ekki eins og við höfum verið á slæmu rönni. 2-2-2 í seinustu 6 leikjum.
2 mikilvægir leikir framundan og ekkert minna en 3 stig er ásættanlegt. Fúlir heima á Gamlárs og QPR úti 2. jan. Meira um það síðar.

Þá er komið að viðureign sem trúlega er boltspjellingum hugleikin. Seinasta viðureign þessara félaga á Carrow er enn í fersku minni frá öðrum í jólum 2004 og hvernig sem fer þá vona ég að Tottarar fái ekki sömu lukkutröllsreið og í það skiptið.

Samanlögð úrslit frá upphafi eru Tottenham í vil og munar þá helst um söguna eftir 1990 því fram að þeim tíma var nokkuð jafnt á metunum.  

17 sinnum hafa NC haft sigur, 14 jafntefli, og 25 töp.

Það eru 5 viðureignir síðan NC hefur haft sigur, þá 1-3 á WHL.

Ég er sjálfsagt að endurtaka mig með því að segja að Lambi fer sjálfsagt í þetta eins og hvern annan heimaleik nema hvað að undan farið hefur hann örlítið verið að þreifa sig fram og baka með mismunandi taktík og með misgóðum árangri. Ég ætla að spá því að Barnett komi inn fyrir Naughton og 4-4-2 verði lendingin með Hestinn og Morison frammi. Svo finnst mér vera kominn tími á að spila Pilkington og Bennett á köntunum en ég stór efa reyndar að Lambi geri það í þetta skiptið. 

Varnarlínan er áhyggjuefni í kvöld og það er vandamál með bæði Barnett og De Laet að annað hvort eru þeir að spila vel eða illa og sjaldnast nokkur millivegur þar á það sem af er tímabils. Ef vörnin dettur niður á góðan leik og annað virkar svona í líkingu við hvernig það gerir venjulega, þá vinnum við þetta í kvöld með einu marki. Spáin er því 2-1 (frekar en 3-2).

Ég er annars ágætlega afslappaður fyrir þennan leik, tek því sem að höndum ber, og ég hugsa að hér geri menn sér dagamun og það verði léttar veitingar og vefstjóri með félaga í heimsókn. Hér stefnir því í eina alsherjar veislu og bjór og aðrar veigar eru komnar út í skafl. Vefstjóri líklegur til að vera með stórar yfirlýsingar á heljar fylleríi þar sem stór orð verða látin falla, jafnvel á meðan á leik stendur. 

Sendi öllum boltspjellingum, 

nær og fjær mínar bestu

jólakveðjur.

Vefstjóri