On the Ball City!

"Sjónvarpspeningarnir"

Fri, 18 May 2012 13:15:21 GMT

Hér er til gamans yfirlit yfir hvert "sjónvarpspeningarnir" hafa farið fyrir s.l. tímabil. Á þessari slóð er frekari yfirferð: með útskýringum.

KENNY REKINN!

Wed, 16 May 2012 15:53:02 GMT

Þetta eru mér ákveðin vonbrigði. Hefði verið til bóta að hafa hann þarna sem lengst. Púlarar væru alla vega ekki að afreka nein ósköp á meðan. En var þetta ekki óhjákvæmilegt ? Reyndist ekki standa undir væntingum auk þess að sverta ímynd félagsins með framkomu sinni í Suarez-málunum.

Hver er næstur í stólinn?

Hodgson horfir framhjá Hestinum !

Wed, 16 May 2012 14:45:53 GMT

Andy Carroll 4 mörk í 34 deildarleikjum í vetur og er valinn sem sóknarmaður í enska landsliðið!

Grant Holt hefur skorað fleiri deildarmörk á Anfield í vetur en Andy Carroll !

15 mörk í 36 deildarleikjum í vetur og næst markahæstur englendinga í úrvalsdeild. Hann situr heima.

Hodgson er á réttri leið.

Spennandi lokaumferð - Blár eða rauður?

Sun, 13 May 2012 10:36:37 GMT

Ég var spurðir að því í gær hvort ég yrði rauður eða blár í dag. Ég sagðist nú verða alveg jafn gul-grænn og venjulega en vissulega yrði spennandi að fylgjast með slagnum um titilinn. Í fyrrasumar spáði ég Man Utd titlinum og það verður ekki aftur tekið. Ég óskaði Man City einskis góðs og vonaði innilega að þeir yrðu hvoru tveggja, án titilbaráttu og án meistaradeildarsætis á þessum tímapunkti. Ég setti þá í 5. sætið, vissulega meira af óskhyggju en rökhyggju.

Í dag er svo komið að mér hefur snúist hugur til titilbaráttunnar. Ekki svo að skilja að ég hafi óskað Man Utd sigurs þó svo að ég hafi spáð þeim titlinum, það skulum við hafa á hreinu. Nei, það var einfaldlega mitt blákalda mat að þeir væru líklegastir til sigurs. Hins vegar hefur baráttan þróast þannig að í dag gæti ég unnt MC að taka titilinn.

Ástæðurnar eru eftirfarandi: Eins og allir vita hefur ekkert skort á hrokann í Ferguson í gegnum tíðina og ósjaldan sem keyrt hefur um þverbak í þeim efnum. Í aðdraganda þessa tímabils og á þessu tímabili hefur sá gamli verið samur við sig og frekar að hann hafi bætt í þegar kemur að allri umræðu um Man City. Það yrði því með ánægju sem ég sæi rostann örlítið lækkaðan í Sör í dag. Það er gaman að rifja upp viðtal þar sem hann var spurður:

„Can Manchester City be top dogs?“ og svarið var „Not in my lifetime“

Í öðru lagi og ekki síður vegur það verulega þungt að stuðningsmenn Man Utd hafa með sínum vanalega sjálfumglaða hætti farið fram úr sér í þetta skiptið. Við boltspjellingar þurfum ekkert að leita langt til vitnis um það. Ákveðnir stuðningsmenn úr hópi þeirra rauðu voru farnir að skiptast á og taka við hamingjuóskum um titilinn í lok mars og byrjun apríl! Megi það verða þeim að kenningu að titillinn rennur þeim endanlega úr greipum í dag þegar MC tekur titilinn og sendir QPR niður.

Það er einmitt 3. þátturinn sem bakkar upp afstöðu mína í dag, fallslagurinn. Það yrði mér verulegt gleðiefni að sjá QPR falla í dag. Ástæðurnar eru fjölmargar en læt nægja að nefna alla þá fjölmörgu pöndita sem felldu NC og Swansea í spádómum fyrir tímabilið en töldu að QPR væru á grænni grein fyrir Warnock og alla milljarðana frá Tony Fernandez.

Í fjórða lagi er svo sú augljósa staðreynd að það er ekkert nema gott fyrir boltann að fleiri séu um hituna en Man Utd. Titlasafn þeirra er s.l. áratugi er orðið ágætt og mál að linni.

Þeim sem ekki huggnast spádómar mínir og óskir, geta leitað huggunar í þeirri staðreynd að yðar einlægur hefur ekki verið þekktur af spádómum sínum fyrir lokadaga keppnistímabila, hvað þá að honum hafi oft orðið að óskum sínum.

Að lokum vil ég svo benda mönnum á að gaman gæti orðið að fylgjast með umræðunni við seinasta pistil. Henni er mögulega ekki lokið. Þar stendur uppá Seniorinn að bregðast við innleggi vefstjóra.

Lokahnykkurinn - Stutt uppgjör

Fri, 11 May 2012 10:22:10 GMT

Það eru annasamir dagar og ef það er ekki eitt þá er það annað sem krefst af mér tíma. Það er samt ekki nema tilhlýðilegt að ég reyni að finna mér tíma fyrir örfáar línur nú þegar tímabilinu er rétt að ljúka. Menn verða bara að virða mér það til viðlits að þessu er ruslað hér inn í flýti og ber merki þess.

Byrjum á NCFC

Í fyrra sumar spáði ég því að NC kæmi til með að enda í 14. sæti deildarinnar og lykju tímabilinu án þess að þurfa að standa í blóðugri fallbaráttu fram á seinasta dag. Ég hafði sterka sannfæringu fyrir þessu og það hefur því verið einstaklega skemmtilegt að fletta í gegnum umfjallanir boltaspekinga frá því fyrir mót og sjá allar yfirskiturnar og dauðadómana sem þá voru kveðnir upp. Vel þekktir pönditar fóru fjálglega yfir stöðuna og í flestum tilfellum var allt á sömu bókina lært. NC átti ekki sjéns. Boltspjellingar, sumir hverjir, tóku þó ekki jafn djúpt í árinni og í hópi þeirra mátti finna aðila sem spáðu NC framhaldslífi í úrvalsdeild að tímabili loknu. Hins vegar er leitun að boltspjellingi sem ekki dróg í land og bjartsýnisspár aðila úr okkar hópi voru strax farnar að líta frekar ómerkilega út þegar fallstimplinum var veifað um miðjan september, af þeim sömu fastagestum hér sem töldu NC lifa tímabilið af.

Eftirminnilegast er þegar Alli og Ævar draga einhverja „Sunnudagsmessu“ fram í dagsljósið máli sínu til stuðnings og svo má auðvitað ekki gleyma því sem stendur hæst uppúr öllu, að á þessu tímapunkti heiðraði Seniorinn okkur með nærveru sinni enda kominn upp með sína. Það fréttist af honum eins og hrút á fengitíma, bísperrtur út um allar koppagrundir, búinn að kolfella NC en titlar á næsta leiti hjá DC. Af einhverjum ástæðum hefur lítið farið fyrir Seniornum eftir því sem á tímabilið hefur liðið og hafa menn talað um „hina vel þekktu, venjulegu, sjálfskipuðu útlegð - þegar á móti blæs" sem skothelda skýringu á því. Í þessu sambandi hefur hluta boltspjellinga verið tíðrætt um eplið og eikina og hefur það þótt með ólíkindum hversu ákveðnum genum virðist hafa verið vel til haga haldið þegar ákveðið epli féll af ákveðinni eik.

Í dag er ljóst að niðurstaðan verður sú að spá mín gengur eftir eða því sem næst. Alla vega verða NC ekki neðar en um rætt 14. sæti. Ég er því fyllilega sáttur við þetta fyrsta tímabil að nýju í úrvalsdeild og rúmlega það.

En hvað skyldi vera framundan? Á þessum tímapunkti ætla ég ekki að hafa mörg orð um það. Umræðan hefur vissulega litast all mikið af umræðunni um Lamba og hvort NC ná að halda honum áram hjá félaginu. Ekkert ætla ég að fyllyrða um það en á þessum tímapunkti er ekkert annað að heyra á honum en að hann ætli að vera áfram. En eins og við þekkjum þá getur útsýnið á morgun verið orðið allt annað en það sem við höfum í dag. Í dag virðist sem stjórinn og stjórninn tali einum rómi um hvert skuli haldið og með hvaða hætti. Að óbreyttu verður sjóður til leikmannakaupa lítið hærri en fyrir síðasta tímabil en þó ber mönnum saman um að styrkja þurfi hópinn í öllum „deildum“. Lágværar hvíslsögur hafa verið í gangi um nýja fjárfestingu þekktra einstaklinga í félaginu sem vissulega gæti orðið upplyfting og til að auka líkurnar á að Lambi hafi möguleika á að beita öðrum aðferðum á leikmannamarkaðnum en að fleyta rjómann í neðri deildunum.

Hvað sem því líður og til að taka þessar seinustu vangaveltur saman í stutta niðurstöðu. Ég tel að Lambi sé tilbúinn til þess að halda áfram svo lengi sem honum finnst að hann hafi tök á frekari uppbyggingu og árangri – sjái prógress. NEMA auðvitað, að uppá borðið detti eitthvert það tilboð sem freistar hans nægilega mikið til að stökkva frá borði. Í mínum huga þyrfti allgott boð og all mikið meira fjárhagslegt svigrúm ef hreyfa á við honum. Ég sé hann t.d. ekki fara til WBA eða Aston Villa, svo dæmi sé tekið.

Að lokum vil ég til gamans henda hér inn Facebook-status frá einum úr hópi okkar boltspjellinga. Það er Manure-maður sem á í hlut og þetta er sett inn 2. apríl s.l:

„Ég hef reyndar verið viss í tær umferðir eða svo en núna í kvöld er ég formlega byrjaður að taka við hamingjuóskum með Englandsmeistaratitilinn 2012. Ég vil líka nota þetta tækifæri til þess að óska nokkrum félögum til hamingju með áfangann: Andri, Þórður, Heiðar, Þráinn, Sigurður, Dagur, Magnús og Mikael - til hamingju með daginn!“

Þess má geta að þarna er á ferðinni maður sem allan sinn feril á boltaspjallinu hefur forðast yfirlýsingar sem líklegar eru til að koma í bakið á honum og ásamt bróður sínum kann þá list að sigla milli skers og báru í umræðunni. Gjarnan er leikið tveim skjöldum og frekar en að vera beinir þátttakendur með ákveðna afstöðu í heitri umræðu þá er frekar reynt að blása í eldinn með stuttum innleggjum sem hallað er eftir því sem betur hentar til að halda lífi í glæðunum. Þar er reyndar sá eldri þeirra bræðra duglegri en sá sem hér á í hlut. En getur það verið að sá yngri sé í djúpum í þetta skiptið? Spyr sá sem ekki veit.

Og að allra síðustu! Sigur NC er óumflýjanlegur á sunnudaginn. Þetta verður síðasti leikur McLeish við stjórnvölinn hjá AV en vonandi ekki sá síðasti hjá Lamba á Carrow.

Timabilið fjarar út...........

Sat, 05 May 2012 10:49:58 GMT

Næst síðasti leikur tímabilsins og mínir mæta í höfuðstaðinn til að taka á Arsenal. Ef við gerum það með sömu silkihönskunum og í seinustu leikjum þá er ekkert annað en sannfærandi Arsenal-sigur í kortunum. Tímabilið virðist vera að fjara út í einhverjum losarabrag hjá mínum og það er ekki nógu gott. Það er því óskandi að mínir menn mæti til leiks í dag með sama hugarfari og krafti sem svo oft mátti sjá fyrir ekki margt löngu. Ég sé þetta nú samt ekki verða svona „walk in the park“ eins og seinast þegar mínir voru á þessum slóðum, þ.e.a.s hjá nágrönnunum THFC. Satt best að segja hallast ég að því að óskir mínar fari fyrir lítið og mínir sitji uppi með fjórða tapleikinn í röð. Í ofanálag kæmi mér ekkert á óvart að skellur væri í uppsiglingu.

Sóltún Stadium er opinn i dag og fyrir tilstilli púlara ætla ég að leggja það á mig að sitja yfir þessu og í fyrsta skiptið, í minningunni, held ég með Chelsea!

NCFC - Liverpool

Sat, 28 Apr 2012 15:09:33 GMT

Ágætu boltspjellingar. Hér er örstutt innlegg í tilefni af leik dagsins. Næ ekki að horfa á hann fyrr en í kvöld. Hugsa að þetta verði létt......eða hvaða halda menn ?

Nú er bara að taka á því á lokasprettinum....

Sat, 21 Apr 2012 09:08:36 GMT

Það er að duga eða drepast fyrir Blackburn í dag þegar þeir fá mína menn í heimsókn á Ewood Park. Fall blasir við þeim ef heldur fram sem horfir. Taphrinan í þetta skiptið er orðin 5 leikja löng en hins vegar er enn svigrúm fyrir björgunaraðgerðir en þá hreinlega verða heimamenn að landa stigunum þremur.

Mínir voru löðrungaðir duglega í seinasta leik og Lambi í fyrsta skiptið í stjóratíð sinni á Carrow með blautu tuskuna í andlitinu. Það var samt ekki fyrr en rúmt korter var af leiknum sem flógáttirnar brustu með þeim hörmungar afleiðingum sem raun bar vitni. Framundir þann tíma voru NC fyllilega að halda sér inní leiknum og fjöldi marktilrauna stóð 14-13 NC í vil (endaði 16-22). Það hefur oftar en ekki reynst NC heilladrjúgt á taka áhættu í jafnri stöðu, eða undir, til að bæta sinn hlut svona á síðasta sprettinum í leikjum sínum. Í þetta skiptið færðust menn of mikið í fang og tilraunir til að opna á varnir MC reyndust háskalegar og sköpuðu einungis frekari opnun bakatil hjá mínum. Menn þekkja framhaldið og bakatil voru mínir teknir „klinikal“, og þar sem hann sat í stúkunni var Ballotelli kominn úr báðum vettlingunum til þess að ná að fylgjast með.

Klárleg, þá er MC sá andstæðingur sem reynst hefur NC erfiðastur á þessu tímabili, og eina liðið í deildinni sem náð hefur að yfirspila NC heima og heiman. 2-11 er samanlögð úrslit og hvergi er öðru saman að jafna.

Í dag er engin hætta á öðru en að Lambi verði búinn að leggja mönnum lífsreglurnar og ef horft er til reynslunnar situr tap í seinasti leik ekki í mínum mönnum nema einungis til að vera þeim hvatning til góðra verka í dag. Nú væri gaman að sjá mína menn rétta sinn hlut í töflunni auk þess sem 750 þús GBP eru fyrir hvert sæti sem vinnst. Ég ætla að spá því að mínir leggi enn frekar falllóð á vogarskálar þeirra Blackburn-manna og í leiðinni grunn að því að enda mótið í efri hluta deildarinnar. Það var 6 marka viðureign í fyrri viðureigninni á Carrow (3-3) og í dag verða mörk en skiptingin 2-3 NC í vil.

S-leikurinn í dag / morgun

Tue, 17 Apr 2012 10:16:36 GMT

Ágætu félagar. Hendi hér inn pistlingi svona til hægðarauka þar sem innlegg við seinasta pistil eru komin á 2. blaðsíðu. Þar sem 9. og næst seinasta umferð Sleiksins er í dag og morgun þá eru að verða seinustu forvöð að koma sér í góða stöðu fyrir lokaumferðina á laugardaginn. Nú dugar ekkert að vera í lágu stuðlunum!

NCFC - Man.City

Fri, 13 Apr 2012 22:30:32 GMT

Þær óvenjulegu aðstæður hafa skapast að þrátt fyrir beina útsendingu á Sky frá Carrow á morgun þá verður yðar einlægur ekki að horfa á sína menn í beinni. Þetta hefur þó komið fyrir en aldrei fyrr af þeirri ástæðu að ég hafi tekið annan leik fram yfir. Það er reyndar ekki alls kostar rétt af mér að orða þetta svona því klárlega er leikurinn á Carrow sá leikur sem ég er spenntastur fyrir á morgun. En hvað gerir maður ekki fyrir vini sína og þá ekki síst þá sem minna mega sín í boltanum um þessar mundir. Sóltún Stadium verður vettvangur 2ja leikja en þar sem tímasetningar stangast á verður manngæska mín og miskunn með Púlurum á morgun og NCFC fer á upptöku meðan horft verður á blá herinn taka rauða herinn í bakaríið.

Það hefur reyndar heyrst af alsherjar ristilskolun á Klanfield. Stólpípan í rörið og Comolli-gerlum og annarra óværu hefur verið skolað út ásamt gömlum húsgögnum. Svo var maðurinn með sjúkrakassann og gamla konan sem straujar búningana sömuleiðis fargað en eigendur félagsins hafa komist að þeirri niðurstöðu að þetta er fólkið sem er ábyrgt fyrir getuleysi þeirra Púlara á þessu ári. Heilagur Klanmaster Kenny er hins vegar örguggur í starfi og þykir líklegt að það verði bara formsatriði fyrir hann að koma Púlurum á rétta braut núna þegar meinið hefur verið fjarlægt. Ég tel að Púlarar hljóti að þurfa að glíma við einhver eftirköst og doða eftir svo umfangsmikla aðgerð. Það verður þeim bláu til hagsbóta í viðureign morgundagsins og sigur því þeirra megin að þessu sinni.

Hvort frækinn sigur heimamanna er í kortunum á Carrow er svo spurning dagsins. Þarna gæti sigur eða tap skipt sköpum fyrir gestina og baráttuna í framhaldinu um toppsætið. Kanarífuglarnir geta mætt sultuslakir í leikinn og ég er ekki viss um nema það geti átt eftir að reynast þungt á metunum þegar upp er staðið. Er ég þá að spá sigri minna manna ? Nei, reyndar ekki. Ég trúi því samt að á góðum degi geti NC sigrað hvaða lið sem er í þessari deild og þar með talið lið MC. Ég hins vegar á bágt með að trúa því að sú innspýting sem það ætti að hafa verið fyrir MC að sjá MU tapa og í kjölfarið 3ja stiga auðveld löndun þeirra í seinasta leik, verði þeim annað en nægileg hvatning til að sækja 3 stig á Carrow. Ég spái því 1-2 sigri MC á morgun.

Að þessu sögðu sé ég þó alveg fyrir mér annan söguþráð geta spunnist um þessa viðureign. Ef mínir ná að velgja MC undir uggum snemma leiks og taka forystuna þá sýnist mér að ansi hreint sé karakterinn í stjörnumprýddu liði MC brothættur. Það gæti í það minnsta orðið þolraun fyrir prímadonnurnar að vinna sig út úr þeim vanda og ef mótlætið verður þaulsetið í vegi þeirra gæti sá augljósi skortur á einingu og samstöðu sem iðulega hefur sést í framgangi liðsins orðið þeim að falli. Megi sá dagur koma.

BOOOOOOOOOOMMMMMM !

Mon, 09 Apr 2012 16:19:50 GMT

Tottenham Loooooosers - NCFC 1-2 "Sorglega lélegt lið sem best er geymt í neðri deildum, þar sem meðalmennska og metnaðarleysi hefur einkennt þetta lið um árabil. Hrútlélegir leikmenn........." (sagt um NCFC fyrr í vetur hér á Boltaspjallinu) .......hehehehehe

:lol:

Ég er ekkert að velta mér eða öðrum uppúr þessu frekar.... er ekkert vanur því að dvelja við sigra okkar neitt sérstaklega. Segi þó aðeins þetta: Léttasti leikur tímabilsins !

WHL í dag !

Mon, 09 Apr 2012 14:01:55 GMT

Örstutt innlegg hér í tilefni dagsins. Vegna gestagangs verð ég ekki við fyrr en síðar til að taka á þessu stöðuna og horfa á leikinn. Þá mæti ég gallvaskur með viðbrögð mín við leik dagsins. Bolta-SMS því ekki vel þegin fyrr en síðla dags.

Kominn tími á góðan heimaleik....

Sat, 07 Apr 2012 10:09:02 GMT

Það er heimaleikur í dag og gestirnir eru Everton. Ef saga deildarleikja er skoðuð hafa Everton tryggja vinninga forskot. Viðureign félaganna fyrr í vetur lauk með jafntefli, 1-1. Um þessar mundir eru hlutskipti liðanna ögn ólík að því leitinu til að Everton er á rönni en NC átt erfiðari tíma en að öllu jöfnu þetta tímabil. Everton hafa haldið hreinu í seinustu 3 leikjum (bikarleikur meðtalinn) sem allir hafa unnist. Þeir hafa einugis tapað 2 af seinustu 11 leikjum í deildinni.

NC hins vegar hafa einugis náð sigri í einum af seinustu 7 leikjum. Þannig að „mátturinn“ er nokkuð Everton megin og veðbankarnir endurspegla það augljóslega.

Mín skoðun er sú að þessi leikur tapist ef Lambi ætlar í frekari tilraunastarfsemi með 3-5-2 ! Ég reyndar tel það verulega ólíklegt að Lambi hafi ekki lært sína lexíu í seinasta leik. Lambi er oftar en ekki „spot on“ þegar kemur að taktíkinni og það kæmi mér stórkostlega á óvart ef hann gerir eitthvað annað en að fara til baka á hefðbundnari slóðir í þessum leik. Því tel ég vera kominn tími fyrir góðan heimaleik. Everton er ekki að skora mikið og ekki að fá mikið á sig svo ég skelli á þetta 1-0 frekar en 2-1.

Liverpool

Mon, 02 Apr 2012 09:42:35 GMT

Ég legg til að KKKenny verði æviráðinn á Klanfield. Á þessu ári í úrvalsdeildinni; 2 - 2 - 8 12 - 18 !

Fúlir í hjallinum í dag....ofl.

Sat, 31 Mar 2012 12:09:09 GMT

Það er hjákátleg staða að vera í að liggja undir ásökunum og uppnefnum fyrir það að vera í felum frá eigin Boltaspjalli vegna þess að NCFC gangi svo illa! Þetta hefur svo sem að mestu glumið úr einni átt og maður veltir fyrir sér hvort þetta sé tilkomið af einhverju öryggisleysi. Ég hef nefnt það áður að það er nánast eins og forréttindi að vera í þeirri stöðu að vera á fyrsta tímabili endurkomu í úrvalsdeild, og hafa verið um og yfir miðja deild allt tímabilið. Það sé svo ekki fyrr en á síðasta þriðjungi tímabilsins að sú staða kemur upp að ekki hafi unnist i 4 deildarleikjum í röð en þó aldrei tapast nema 2 í röð. Þá grípur um sig einhver móðursýki fyrir mína hönd eins og himin og jörð séu að farast. Liðið sígur niður fyrir miðja deild en þó ekki nema 2-3 stigum frá 8. sætinu og menn byrja að tala um hrun, krísu og erfiða tíma. Það að þetta skuli svo fara saman við annatíma vefstjóra á öðrum vettvangi þýðir að hann er lagður á flótta.

Á meðan er vefstjóri góðglaður, ánægður, bjartsýnn og sallarólegur. Þó svo að vissulega væri gaman að sjá NC enda þetta tímabil sem allra hæst þá horfir þetta nú fyrst og fremst þannig við mér að takmarkinu að tolla uppi er náð. M.ö.o. þá er það ekkert ofur atriði hvort lokasætið er 8. eða 17. á þessum tímapunkti. Þeir sem ekki geta haldið sálarró sinni vegna þessa bendi ég á næsta Apótek.

Í dag eru mínir í heimsókn í hjallinum sem kallaður er Craven Cottage. Ég hef sett 300 krónur á það í leik okkar félaganna að mínir fari með sigur af hólmi í þessum leik. Satt best að segja hef ég enga sannfæringu fyrir þessu og tel mun líklegra að þetta fari eins og venjulega gegn Fulham. Sagan er NC ekki hliðholl nú á síðari tímum þegar þeir fúlu eru annars vegar. Í augnablikinu eru 9 leikir síðan að mínir hafa náð sigri gegn Fulham og seinasta viðureign þessara liða í hjallinum er leikur sem ég hef engan áhuga á að rifja upp.

Ég spái því 3-1 í dag fyrir Fulham. Þetta er svona 70-20-10 leikur í mínum huga. Í Sleiknum sný ég þessu við og er það meira til gamans gert. Ekkert er heldur ómögulegt og ófáum „húdúunum“ hefur verið stökkt á flótta eftir að Lambi tók við. Vonir mínar og draumar eru því á 10 prósentunum.

Loks vil ég fagna því að menn hafa tekið vel í annan Sleik. Vonandi verður þetta jafnar og meira spennandi en seinast og þátttakan góð. Ekkert bendir til annars en við náum svipuðum fjölda og seinast. Vil ég hvetja menn til að græja sig tímanlega og muna að allir leikir byrja nú fyrr en verið hefur því kominn er sumartími hjá bretanum. Einnig verða menn að muna að leggja inn þátttökugjaldið svo spádómur (veð) geti talist góður og gildur.